Sot, në ambjentet e Bashkisë së Pogradecit ( Bashkia Pogradec (Faqe Zyrtare) u zhvillua eventi hapës i projektit njëvjeçar: “Ndërtimi i Qëndresës tek të Rinjtë dhe Gratë në Pogradec për të Parandaluar Ekstremizmin e Dhunshëm”.

Ky aktivitet u organizua nga Gender Alliance for Development Center (GADC) me Nisma për Ndryshim Shoqëror, ARSIS dhe u mbështetet nga Global Community Engagement and Resilience Fund dhe zbatohet në bashkëpunim me Qendrën e Koordinimit Kundër Ekstremizmit të Dhunshëm ( Ministria e Brendshme ).

Eventi mblodhi figura të nivelit të lartë drejtuesish me prezencen e Drejtoreshës së Qendrës së Koordinimit Kundër Ekstremizmit të Dhunshëm znj. Lejdi Dervishi, Nënprefekti i Pogradecit z. Luan Maxhari, përfaqësues nga Bashkia e këtij qyteti, si dhe përfaqësues të organizatave të shoqërisë civile.

Në fjalën e saj, znj. Dervishi vuri theksin te roli që luajnë të rinjtë dhe gratë për të identifikuar dhe kundërshtuar në mënyrë aktive ekstremizmin e dhunshëm. Përmes angazhimit në organizata rinore, aktiviteteve kulturore, sporteve dhe projekteve sociale, të rinjtë mund të ndërtojnë ura dialogu mes komuniteteve të ndryshme dhe të parandalojnë përhapjen e ideologjive ekstremiste duke u bërë zë i paqes në komunitetet e tyre, theksoi ndër të tjera znj. Dervishi.

QKEDH mbështet në mënyrë të vazhdueshme të gjitha programet që synojnë fuqizimin e të rinjve dhe grave në nivel komunitar, si një nga shtyllat kyçe në parandalimin dhe kundërshtimin e ekstremizmit të dhunshëm në Shqipëri.