Në datë 14 Korrik 2025, në ambientet e Hotel Tirana International u zhvillua Forumi Kombëtar “Ndikimi i performancës së Këshillave Vendorë të Sigurisë Publike në parandalimin dhe luftën kundër ekstremizmit të dhunshëm”, organizuar nga Qendra ASSIST dhe Instituti për Aktivizëm dhe Ndryshim Social (IANS) , me mbështetjen e Qendrës Ndërkombëtare të Ekselencës ( Hedayah ) dhe Komisionit Evropian.

Forumi mblodhi përfaqësues nga institucione shtetërore dhe vendore, organizata të shoqërisë civile dhe partnerë ndërkombëtarë, për të diskutuar mbi përvojat dhe sfidat në forcimin e rolit të Këshillave Vendorë të Sigurisë Publike (KVSP) si mekanizma lokalë në identifikimin dhe menaxhimin e rasteve të ekstremizmit të dhunshëm.

Gjatë aktivitetit, Koordinatorja Kombëtare për Parandalimin dhe Kundërshtimin e Ekstremizmit të Dhunshëm, znj. Lejdi Dervishi si dhe Drejtori Ekzekutiv i Hedayah Z. Al- Qassimi vlerësuan rolin e Qendrës së Koordinimit kundër Ekstremizmit të Dhunshëm (QKEDH) si një mekanizëm kyç në forcimin e bashkëpunimit ndërinstitucional dhe mbështetjen teknike për KVSP-të në nivel vendor në bashkëpunim me organizatat ndërkombëtare.

U prezantua gjithashtu një vlerësim i parë i performancës së KVSP-ve në pesë bashki pilot: Cërrik, Elbasan, Librazhd, Pogradec dhe Korçë – me synim rritjen e efektivitetit të tyre në parandalimin e radikalizmit.

Forumi, me praninë e përfaqësuesëve nga Delegacioni i BE-së në Tiranë, z.Casale e Prefektëve z.Ilir Bejtja – Prefektura e Qarkut Elbasan dhe z.Nertil Jole – Prefektura Korçë si dhe Drejtorin e Drejtorisë së Antiterrorit pranë DPSH, Policia e Shtetit shërbeu si një hap i mëtejshëm në angazhimin institucional për forcimin e sigurisë në komunitet përmes qasjes gjithëpërfshirëse dhe parandaluese.