Më datat 13-14 nëntor 2025, Qendra e Koordinimit kundër Ekstremizmit të Dhunshëm mori pjesë në aktivitetin rajonal të organizuar nga EU Knowledge Hub, i fokusuar në zbatimin e Planit të ri të Përbashkët të Veprimit për Parandalimin dhe Kundërshtimin e Terrorizmit dhe Ekstremizmit të Dhunshëm për Ballkanin Perëndimor.

Ky takim pasoi nënshkrimin e Planit të ri të Përbashkët të Veprimit për Parandalimin dhe Kundërshtimin e Terrorizmit dhe Ekstremizmit të Dhunshëm nga gjashtë vendet e Ballkanit Perëndimor (Shqipëria, Kosova, Mali i Zi, Serbia, Bosnja dhe Hercegovina, dhe Maqedonia e Veriut), më 30 tetor 2025 në Bosnjë dhe Hercegovinë.

Takimi në Shkup bashkoi aktorët kryesorë nga rajoni për të avancuar zbatimin e këtij plani. Një element thelbësor për suksesin e tij është hartimi i udhërrëfyesëve kombëtarë, të cilët do të shërbejnë si instrumente të përshtatura për përkthimin e prioriteteve rajonale në veprime konkrete për secilin partner, duke ruajtur koherencën në të gjithë rajonin.

Objektivi kryesor i takimit ishte mbështetja e vendeve partnere në zhvillimin e udhërrëfyesëve kombëtarë të harmonizuar me Planin. Synimi është krijimi i një strukture të përbashkët që lejon përmbajtje specifike për secilin vend, duke siguruar koherencë dhe lehtësuar monitorimin, krahasimin e niveleve të zbatimit dhe identifikimin e nevojave për mbështetje teknike.